من ايستره‌م هئچ بيلميره‌م هارايا گئديم
من ايستره‌م هئچ بيلمره‌م كيمي چاغيريم
من ايستره‌م هئچ بيلمره‌م نه يي باغيريم
من وئرگي‌دن قورخمويورام
منه گره‌ك دير حاققيمي قورويام
من تورپاقدان، يارپاق حاققيمي ايستره‌م
من آغاج كيمي تورپاق دان يارپاق حاققيمي ايستره‌م
* * *
ماسكا ايله گوز گويه باخانلار
اؤزلريني گؤرمز اولدولار
مين دري يه قويلانانلار
اؤزلريني سئچمز اولدولار
من شهرين قديم گوبه گينده
گزنتي غريب لرين قهوه خاناسيندا
بير عاشيق اوخوماسينا قولاق آسيرام
بير دري بير اوزلو چيلپاق آداملاريلا
سلاملا شيرام
من اوقوپوز كيمي عاشيق دان
چيلپاق حاققيمي ايستره‌م
من حاققيمي ايستره‌م
* * *
دوزموش شهرين اورتا گؤبه گينده
بير ميز اوسته بارداغلارين قوجابالچي
بال بال دئيه‌ره‌ك شيرين‌له دير، شيشيردير
يولچولارين داما قلارين قوجا بالچي
يولچولارين بارماقلاري بالا باتير درين- درين
بالدان چيخير شيرين- شيرين
توت اورادا بير اوشاقسان سن
او بالين هئچ ميزينه چاتميرالين- ديلين
قوجابالچي سني گؤرور- سني گؤرمور
من او اوشاق كيمي بال بارداغيندان
بارماق حاققيمي ايستره‌م
من حاققيمي ايستره‌م.داريخديم
آنام ائوده اولمايان كيمي
داريخديم سن سيز
قلمي اليمده سيخديم، هاسيخديم سن سيز
چيراغيميز سؤنوك
اوجاغيميز سويوق،
قاپيلار، قورخولو، ديوارا داياقلي آچيق
كيپريك لريم كيمي!
دوداقلاريم كيمي
چاتلاق چاتلاق
قاباردي اوره گيمين ياناقلاري،
بارماقلاريم كيمي داريخديم سن سيز
بارماقلاريم داراغيم دير
سنين ساچيندان گئجه ني يارماق ايچون؛
گونشه وارماق ايچون
داريخديم سن سيز
آنام ائوده اولمايان كيمي.